Smartphone users ke liye ek badi aur thodi pareshan karne wali khabar samne aayi hai. Reports ke mutabiq, Bharat sarkar ek aise naye niyam par vichar kar rahi hai jo aapke phone ki location ko 24 ghante 'ON' rakhne ke liye majboor kar sakta hai. Is proposal ne Apple, Google aur Samsung jaisi badi tech companiyon ki neend uda di hai. Agar yeh niyam lagu hua, toh aap chaah kar bhi apna GPS band nahi kar payenge. Aaiye jante hain kya hai yeh pura maamla aur aapki privacy par iska kya asar padega.
Sarkar Ka Naya 'Tracking' Proposal Kya Hai?
Darasal, telecom operators ki sanstha COAI ne sarkar ko ek sujhav diya hai ki desh mein bikne wale sabhi smartphones mein 'A-GPS' (Assisted GPS) technology ko hamesha ke liye activate rakha jaye. Abhi jab police ya agencies kisi ko track karti hain, toh wo mobile towers ka data use karti hain jo hamesha accurate nahi hota. Naye niyam ka maksad hai ki agencies ko meter-level tak ki exact location mile, taaki criminals ko pakadna aasan ho.
Tech Companies Kyu Hain Naraz?
Apple, Samsung aur Google ne is proposal ka sakht virodh kiya hai. Unka kehna hai ki duniya mein kahin bhi aisa niyam nahi hai jahan user ko location band karne ka option na mile. ICEA (India Cellular & Electronics Association) ne warning di hai ki agar location hamesha on rahi, toh hackers aur cyber criminals ke liye logon ko track karna aur bhi aasan ho jayega. Yeh 'Privacy' ke basic adhikar ka bhi ullanghan mana ja raha hai.
Aam Aadmi Ke Liye Kya Badlega?
Electric Car Charging Ab Hua Sasta: Government Ne Nayi Charging Subsidy Ka Plan Jaari Kiya
Agar yeh niyam lagu hota hai, toh aapke phone mein kuch bade badlav dekhne ko mil sakte hain jo shayad aapko pasand na aayein:
- Phone settings mein 'Location Off' karne ka button hataya ja sakta hai.
- Jab koi app ya agency aapki location dekhegi, toh aapko koi notification nahi milega.
- Battery consumption badh jayega kyunki GPS hamesha background mein chalega.
Suraksha vs Privacy: Bada Sawal
Sarkar ka tark hai ki national security aur crime control ke liye yeh zaroori hai. Lekin experts ka manna hai ki journalists, activists aur judges jaise high-profile logon ki jaan ko isse khatra ho sakta hai. Filhal sarkar ne is par koi final faisla nahi liya hai aur abhi vichar-vimarsh jari hai. Pichle dino 'Sanchar Saathi' app ko mandatory karne ka faisla wapas lene ke baad, yeh naya proposal ek aur nayi bahas chhed chuka hai.
Kya aap apni suraksha ke liye 24 ghante location track karwane ko taiyar hain, ya privacy aapke liye zyada zaroori hai? Comment karein.
