Ladli Behna Yojana: Madhya Pradesh ki karodon behno ke liye December ka mahina nayi Khushkhabari lekar aa raha hai. Agar aap bhi is yojana ki labharthi hain, toh aapke liye 10 tarikh behad khaas hone wali hai. Reports ke mutabiq, rajya sarkar is baar bhi samay par mahilaon ke khate mein paise transfer karne ki taiyari kar rahi hai. Aayiye jaante hain ki is baar kist mein kya naya hone wala hai aur aap apna status kaise check kar sakti hain.
10 December ko khate mein aayenge paise?
Sarkar ne pehle hi saaf kar diya hai ki har mahine ki 10 tarikh ko 'Ladli Behna Divas' manaya jata hai aur kist jari ki jati hai. Pichli kai kiston ka trend dekhein toh sarkar 10 tarikh ko hi single click ke madhyam se paise transfer karti hai. Umeed lagayi ja rahi hai ki 10 December ko bhi rajya sthariya karyakram mein CM behno ke khate mein rashi antarrit (transfer) karenge. Halanki, agar koi sarkari chutti hui toh 1-2 din ka badlav ho sakta hai.
Kitni Rashi milne ki hai umeed?
Shuruwat mein is yojana ke tahat 1000 rupaye diye jate the, jise baad mein badhakar 1250 rupaye kar diya gaya tha. Behno ko umeed hai ki sarkar apne wade ke mutabiq ise dhire-dhire badhakar 3000 rupaye tak le jayegi. Filhal, adhikarik taur par rashi badhane ka koi naya 'Official Order' nahi aaya hai, isliye is mahine bhi purani nirdharit rashi aane ki hi sambhavna hai. Sahi jaankari funds release hone par hi milegi.
Account mein DBT Active hona zaroori
World AIDS Day 2025: Sarkar Ka Naya ‘Phase-V’ Plan Launch, 2030 Tak Bimari Khatam Karne Ka Target
Paise aane mein koi rukawat na ho, iske liye sabse zaroori hai ki aapka bank account Aadhar se link ho aur DBT (Direct Benefit Transfer) active ho. Kai baar mahilaon ke paise isliye atak jate hain kyunki unka KYC update nahi hota. Agar aapne abhi tak bank jakar ye check nahi kiya hai, toh 10 tarikh se pehle ise zaroor karwa lein, nahi toh kist 'Failed' ho sakti hai.
Kashi Tamil Sangamam 4.0: Varanasi Mein Shuru Hua Cultural Mahakumbh, PM Modi Ka Special Message
List mein apna naam kaise dekhein?
Agar aapko shaq hai ki aapka naam list mein hai ya nahi, ya kist ka status dekhna chahti hain, toh in steps ko follow karein:
- Official website cmladlibehna.mp.gov.in par visit karein.
- Menu mein 'Avedan ki Sthiti' ya 'Antim Suchi' par click karein.
- Apna Panjiyan Kramank (Registration No.) aur Captcha dalein.
- OTP verify karke apna payment status check karein.
Awas Yojana aur anya labh
Ladli Behna Yojana ke saath-saath sarkar 'Ladli Behna Awas Yojana' par bhi focus kar rahi hai. Jin behno ke paas pakka ghar nahi hai aur unhone aweden kiya tha, unhe awas yojana ki kist ka bhi intezaar hai. Sambhavna hai ki naye saal se pehle sarkar housing scheme ko lekar bhi koi bada Dhamaka kar sakti hai. Gas cylinder subsidy ke liye bhi apne documents taiyar rakhein.
Kya aapko lagta hai ki sarkar ko ab rashi badhakar 3000 rupaye kar deni chahiye? Comment karke apni raay dein.
